بحـور الشعـر واوزانها ... مهم لكل شاعر...او مبتدء

من طرف مازن آل حويس الثلاثاء أبريل 29, 2008 6:27 pm

الســــــلام عليكم ورحمة الله وبركــــاته***

جبيت أتطرق في هذا الموضوع

على وزن البيت من خلال اللحن

( وانقل لكم الطريقة الأسهل والأشهر )

وياليت كل واحد فينا قبل ماينشر

قصيدته .. يحاول أنه يتأكد من وزنها .!

ومن ناحية الوزن على طريق التفعيلة .!

اللي يعرف الطريقة كيف .. لابد أن يتذكر

ثلاث نقاط مهمه .!

1/ الحرف الذي لاينطق لايكتب ولايضع بالميزان

والعكس صحيح .
2/ حروف العله دائمً سواكن

3/ التقطيـع .: هو تقسيم البيت الى مقاطـع صوتيـة .

( يعني تنطـق البيت نطق صحيح ) من أجل وزنه .

أولاً .:/

طبعاً البحـور واجد ومافي
احد يقدر يحصيها كلها .!
يمكن فيه بحور صحيحه ويمكـن لا
عشان كذا أنا بكتفي في شرح
بعض من البحور المشهورة
وقبل مانتطرق لطريقة اللحن ..!
أحب أوضح كيف تعرف الكسر عن طريق اللحن
وأبي اضرب لكم مثال .!
ومن الأمثلة بيت لخالد المريخي
____________

أجيك يسلم راسك وشلون ماجيك /// وياك انا بالذات صعب أتغلى
حاولوا تغنوها معاي
طيب .. الحين أبي اغير بعض كلمات البيت
( يعني أحاول أكسر البيت )
وأبيكم تغنونها بنفس اللحن .!
البيت /
أجيك يسلم راسك بالله كيف ماجيك /// وياك أنا صعب وربي أتغلى
شنو لاحظتوا ..!!؟؟
أتوقع أنكم لاحظتوا الكسر .!
يعني اللحن مو راكب على البيت .!
هذا يدل على أن البيت مكسور .. وهكذا .!
والحين ندخل على البحور وتفعيلاتها
والالحان اللي تركب عليها .!

1- البحر المسحوب

مستفعلن مستفعلن فاعلاتن /// مستفعلن مستفعلن فاعلاتن
المثال من أحد أبياتي .:
أنشدك ياماجد عن أنسان معروف /// قايد توفى وأندفن باللحايد
ومثال آخر :
أن غبت عني حن قلبي وتشره // وأن جيتني قلبي حفظ كل تقدير
والأغاني والألحان واجـد لكـن التفعيلات والوزن موحده

2- البسيط

مستفعلن فاعلن مستفعلن فعلن /// مستفعلن فاعلن مستفعلن فعلن
وفيه قولين /
الأول يقول ان الأخير "فاعلن"
والثاني يقول انها فعلن .. ويجوز تكون اثنينهم
لكن الاحتمال الأقرب عندي انها " فعلن "
لان الاغاني تفعيلتها بالأخير (فعلن)
ومثال على هالبحر .:
مهما يقولون مهما صار مهما تـم // انت البدايات وآخر ساحل ومينا
والألحان والاغاني اللي عليه واجد بعد

3- الطويل

فعولن مفاعيلن فعولن مفاعيلن /// فعولن مفاعيلن فعولن مفاعيلن
نوى القلب يمشي لك على السمع والطاعه // نوى القـلب نيّـه ما نواهـا لحد غيـركـ
الطويل الخلاف عليه واجد او يمكن انا ماعندي إلمام فيه

4-الممتد

فاعلن فاعلاتن فاعلن فاعلاتن /// فاعلن فاعلاتن فاعلن فاعلاتن
المثال :
رحت يم الطبيب اللي يداوي الجروحي ** قال جرح المودة مايسر الداوء به
واللحن اللي يركب عليها

5-المديد

فاعلاتن فاعلن فاعلاتن /// فاعلاتن فاعلن فاعلاتن
المثال : طايرات الميق واحد وعشرين ،، ماتصيب أهدافـها مثل عينك

6- الصخري

مفاعيلن مفاعيلن مفاعيلن /// مفاعيلن مفاعيلن مفاعيلن
المثال : مساء الخيـر والإحساس والطيـبه // مسـاء ٍمايـليق إلا بأحبـابي

وفيه ملاحظه على الصخري .!
البحر هذا مو ملزوم يكتـب على قافيتين
يعني الشطر الأول مو شرط ان القافيه تتكرر فيه
لكن الشطر الثاني لازم تكون قافيته وحده
وطبعا هذا على حسب اختيار الشاعر
اذا يبيها بقافيه وحده او قافيتين
ومن امثال الصخري ذو قافيه واحده :
وعصفور ٍ شرب من نـور كفـّك // تمنّـى النجم لو يلمس حريره
وشمس القيـظ في كامل حياها // ترنّح من جبينك مستــجيره

7-الرملي أو الرمل

فاعلاتن فاعلاتن فاعلاتن /// فاعلاتن فاعلاتن فاعلاتن
المثـال : ماهقيت ان البراقع يفـتنني ،، لين شفت ظبى النفـود مبرقعاتي

8-المتدارك

فاعلن فاعلن فاعلن /// فاعلن فاعلن فاعلن
بصراحة ماعندي خلفيه عنه نهائي .!

9-المتقارب

فعولن فعولن فعولن /// فعولن فعولن فعولن
وهذا البحر أيضاً ماعندي خلفيه عنه نهائيا

10-الرجز

مستفعلن مستفعلن مستفعلن /// مستفعلن مستفعلن مستفعلن
ودي اوضح نقطه مهمه في بحر الرجز مذكورة في بحور الخليلي
وناس يقولون يُـستعمل فالنبطــي
والله اعلم
الرجز تفعيــلاته : مستفعلن مستفعلن مستفعلن .. بالفصحى
وفيه بحر بالنبطي تفعيــلاته :
مستفعلن مستفعلن مستفعلن مستفعلن .. يعني اربع ..
ويقولون هذا رجز النبطـي
لكن ماأدري
المثال :
ستل جناحه ثم حام يرقى على متن الهوى /// يزفه بعيداً وانا محدود في حد النظر

11-الهلالي

مستفعلن مستفعلن مفاعيلن /// مستفعلن مستفعلن مفاعيلن
يقال بأنه سمي بالهلالي نسبة لأن أول من قاله هم من بني هلال
الذين سكنوا نجد .!
وقد اكثروا في استخدامه . وهو أيضاً
يسمى بالبحر الطويل .
وبصراحه مالقيت بيـت على الهلالي
واكتفي بالتفعيلات اللي ذكرتها للبحر .!

12-الشيــبانــي

مفاعيلن مفاعيلن مفاعيلن مفاعيلن /// مفاعيلن مفاعيلن مفاعيلن مفاعيلن
مثال على البحر .:
عيونك آخر آمالي وليلي أطول من اليم /// وكيف ألقى كلامً عذب يوصف دافي أحساسي

13/ هذا البحر ماعرف أسمه ولكن يستخدمونه كثيراً في القلطة

فاعلاتن فاعلاتن فاعلاتن فاعلاتن /// فاعلاتن فاعلاتن فاعلاتن فاعلاتن
وهذه التفعيلات انا اللي طلعتها
وماأدري اذا صحيحه او لا لكن اقرب مالها كذا .!
ومثال عليه .:
الله اللي راد والعقده قضاها اللي عقدها // لا على الدنيا سلام ولا لي باقي العمر زينه

ومن ضمن البحور أيضاً

(بحر الونـه)

وهو بحر يكثر أستعماله في الشعرر العامي
وخاصةً في الامارات
مثال عليه .:
قاصد جداكم حافي // يا حلويـن المنشـم
ولكم ضميري صافي // ولغيـــركـم مايضـم

( بحر الهجيني )

( والهجيني أنواع واجـد ) وهذا من أحـد هذه الانواع
وعلى فكره هذا النوع جداً مشهـور
وبالنسبه لي أنا أحب أكتب كثير عليه
لاني أحس يوم أكتب عليه أوظف الاحسـاس بعذوبه

بعطيكم مثال على البحر :

للشاعر الأماراتي هادي المنصوري
كل ما دنّ القلم يبغى القصيد /// انكتب له اسم زايد في دواه
لين مد الحبر من عرق الوريـد /// وقام ينزف كل طاروق ابتداه

وفالكم البيرق
منقول....